Photo: Jex Vilar/ Facebook
HALOS 12 taon inilihim ni Jex Villar ang pagtingin para sa kaibigang si Zaldy Faller hanggang sa mangyari ang hindi inaasahan na babago ng kanilang kwento.
Kahit sa hinagap ay hindi sukat akalain ni Jex na ang coronavirus pandemic at enhanced community lockdown pa pala ang magiging turning point para ang long time boy friend na si Zaldy ay maging kanyang boyfriend.
Ayon sa report ng evening newscast na Saksi ng GMA 7, inabutan ng Luzon-wide lockdown ang dalawa nang mamasyal sa Baguio City kamakailan.
Dahil sila lang ang magkasama at nag-uusap sa tinutuluyan, mas nakilala pa nila ang isa’t isa at dito na nga nagkaaminan ng tunay na nararamdaman na kinimkim sa mahabang panahon.
Sabi ni Jex, since 2008 ay crush na niya ang kaibigan. Isang araw ay nagtanong si Zaldy, “ano tayo na ba?”
Matapos noon ay nauwi na ang kanilang pagkakaibigan sa pagkaka-ibigan.
Photo: Jex Vilar/ Facebook
Sa ngayon ay nakabalik na sa Maynila ang magkasintahan, base sa report.
Plano ng dalawa na mag-date as official couple ngunit dahil bawal pa ang hhww (holding hands while walking) at sarado pa ang mga pasyalan gayundin ang dine-in sa restaurants bilang pagsunod sa social distancing, maghihintay muna ulit sina Jex at Zaldy ng right timing para ipagdiwang ang kanilang namuong pag-iibigan.
“Plano naming mag-date na hindi na makapag-facemask,” sabi ni Jex.
Patunay ang love story ng friends turned lovers na ito na hindi mapaghihiwalay kahit ng physical distancing ang mga pusong nakatakdang magkalapit.
